டிரஸ்ட் ஆஃப் இன்டர்நேஷனல் பவுண்டேஷன் ஃபார் பீப்பிள் வெல்ஃபேர் அண்ட் டெவலப்மெண்ட் (IFPWD) மற்றும் சிக்ஸ் சிக்மா ஹெல்த்கேர் இணைந்து நடத்திய “மக்கள் நலப் பயணம்” சமூக நலத் திட்ட துவக்க விழா மற்றும் மாபெரும் பல்துறை இலவச மருத்துவ முகாம் திருப்பத்தூரில் சிறப்பாக நடைபெற்றது. இந்த நிகழ்ச்சி, திருப்பத்தூர் மாவட்ட வரலாற்றில் இதுவரை இல்லாத அளவிற்கு மிகப்பெரிய சமூக மருத்துவ சேவை நிகழ்வாக அமைந்தது. நிகழ்ச்சி அழைப்பிதழில் மருத்துவ முகாம், சமூக நலத் திட்டங்கள் மற்றும் தொடக்க விழா இடம்பெற்றிருந்தன.
இந்நிகழ்ச்சியில் சிறப்பு விருந்தினர்களாக டாக்டர் பிரதீப் பரத்வாஜ், பிரபல திரைப்பட பாடலாசிரியர் கவிஞர் சினேகன், மற்றும் தேசிய பட்டியல் இன ஆணையத்தின் (NCSC) இயக்குநர் டாக்டர் ஆர். ஸ்டாலின்,ஸ்ரீ விஜய் வித்யாலயா கல்வி நிறுவனங்களின் நிறுவனர் மற்றும் தலைவர் திரு. டி.என்.சி. மணிவண்ணன், Areness, நியூ டெல்லி நிறுவனத்தின் தலைமை செயல் அதிகாரி (CEO) வழக்கறிஞர் சாகர் அகர்வால், ஓசூர் மாநகராட்சி மேயர் திரு. எஸ்.ஏ. சத்யா, ரோட்டரி கிளப்பின் பல்வேறு மாவட்ட மற்றும் கிளைத் தலைவர்கள், பல தன்னார்வ மற்றும் சமூக நல அமைப்புகளின் (NGO) தலைவர்கள், மருத்துவத் துறை நிபுணர்கள், சமூக ஆர்வலர்கள் மற்றும் பல்வேறு முக்கிய பிரமுகர்கள் கலந்து கொண்டு நிகழ்ச்சியை சிறப்பித்தனர். இவர்களின் முன்னிலையில் மருத்துவ முகாம், சமூக நலத் திட்டங்கள் மற்றும் மக்கள் நலப் பயணம் இயக்கம் தொடங்கி வைக்கப்பட்டது.
இந்த மாபெரும் மருத்துவ முகாமின் மூலம் 2,000-க்கும் மேற்பட்ட பொதுமக்கள் இலவச மருத்துவ பரிசோதனை, மருத்துவ ஆலோசனை, ஆய்வக பரிசோதனை, கண், பல், இதய, மகப்பேறு உள்ளிட்ட பல்வேறு சிறப்பு மருத்துவ சேவைகள் மற்றும் இலவச மருந்துகளை பெற்றனர்.
மேலும், 200-க்கும் மேற்பட்ட மாற்றுத்திறனாளிகள் இந்நிகழ்ச்சியில் பல்வேறு நலத்திட்ட உதவிகளைப் பெற்றனர். அவர்களுக்கு காது கேளாமை கருவிகள் (Hearing Aids), சக்கர நாற்காலிகள் (Wheel Chairs), அரிசி மூட்டைகள், மளிகைப் பொருட்கள், சேலைகள் மற்றும் வேட்டிகள் வழங்கப்பட்டன. மாற்றுத்திறனாளிகளின் வாழ்க்கைத் தரத்தை உயர்த்தும் நோக்கில் இந்த நலத்திட்ட உதவிகள் வழங்கப்பட்டமை நிகழ்ச்சியின் முக்கிய அம்சமாக அமைந்தது.
இந்த மருத்துவ முகாமில் ஸ்ரீ ராமச்சந்திரா மருத்துவக் கல்லூரி மற்றும் மருத்துவமனை, அப்போலோ மருத்துவமனை, காவேரி மருத்துவமனை, டாக்டர் அகர்வால்ஸ் கண் மருத்துவமனை, ராகாஸ் பல் மருத்துவக் கல்லூரி மற்றும் மருத்துவமனை உள்ளிட்ட முன்னணி மருத்துவ நிறுவனங்களுடன், பல்வேறு மருத்துவ அமைப்புகள், சமூக நல அமைப்புகள் மற்றும் தன்னார்வ அமைப்புகள் இணைந்து பங்கேற்றன.
மேலும், 200-க்கும் மேற்பட்ட மருத்துவர்கள், பல் மருத்துவர்கள், செவிலியர்கள், மருத்துவப் பணியாளர்கள் மற்றும் தன்னார்வலர்கள் ஒருங்கிணைந்து பொதுமக்களுக்கு தரமான மருத்துவ சேவைகளை வழங்கினர். இவ்வளவு அதிக எண்ணிக்கையிலான மருத்துவ நிபுணர்கள் ஒரே இடத்தில் இணைந்து சேவையாற்றியது திருப்பத்தூர் மாவட்டத்தில் முதல்முறையாக நடைபெற்றது.
இந்நிகழ்ச்சி வெற்றிகரமாக நடைபெற ஒத்துழைப்பு வழங்கிய அனைத்து மருத்துவமனைகள், மருத்துவர்கள், மருத்துவப் பணியாளர்கள், சமூக அமைப்புகள், தன்னார்வலர்கள், நன்கொடையாளர்கள் மற்றும் பொதுமக்கள் அனைவருக்கும் IFPWD மற்றும் சிக்ஸ் சிக்மா ஹெல்த்கேர் சார்பில் மனமார்ந்த நன்றிகள் தெரிவிக்கப்பட்டன.
“ஒவ்வொரு கிராமத்திற்கும் சுகாதாரம் – ஒவ்வொரு குடும்பத்திற்கும் நம்பிக்கை” என்ற உயரிய இலக்குடன், மக்கள் நலப் பயணம் திட்டம் தமிழகம் முழுவதும் விரிவுபடுத்தப்படும் என்றும் அறிவிக்கப்பட்டது.
